- 109 -

1337. Feb. 18. Liegnitz.

Herzog Boleslaus III. bestimmt den Schoss und das Münzgeld der Städte Liegnitz, Goldberg und Hainau.

Wir Boleslaw von gotis genaden herczog von Slesien vnd herre zu Legnicz thun zu wissen allen den, dy desen briff sehen, horen adir lesen, das durch hulfe, dy vnse getrawe manne ritter vnd knechte in vnsem lande zu Legnicz, zu dem Goltperge vnd zu Haynaw, vnd vnse getrawen burger zu Legnicz, zu dem Goltberge vnd zu Haynaw, dy se vns nu czu vnsir not thun vnd offte getan han zu nutze vnd zu fromen vnd durch eines guten alders willen vnsern vorgenanten vnd burgern zu Legnicz, zu dem Goltperge vnd zu Haynaw, globin wir in guten trewen ane allirley argelist, daz wir alle vnse man, ir schülteisen, knechte vnd gebawere vnd alle vnse burgere zu Legnicz, zu dem Goltberge vnd zu Haynaw, arme vnd reiche sullen von desem tage vorbasme, dy weyle wir leben, lassen bey erem rechten, geschosse vnd bey allem eren rechte vnd freyheyt, das se beweysen mugen mit irre wissen, wy das mit rechte an se komen sey, das vnse man vnd burger noch irre wissen vnd (an?) vnsir wedir rede das vnse man von irme gute, das vns geschocz schuldik ist, nicht mer sullen vns geben wenn von der cleinen huben einen virdunk zu geschosse vnd ein lot zu müncze gelde, von der grosen huben newn skot zu geschosse vnd zwey skot zu müncze gelde, vff sant Walpurgin tag abir einen firdung von der cleinen huben zu geschosse vnd ein lot zu münczegelde vnd drey scheffel getreydes, einen kornes, einen gersten vnd einen habern. Von der grosen huben newn skot zu geschosse vnd zwey scot zu münczegelde vnd funfftehalben scheffil dreyerley getreides. Wir geben auch zu genaden, das vnsen mannen, wenn man vnse geschosz adir münczegelt beschreybet nach der huben czal, das man einen vor den andern, dy das gegeben han, nicht pfenden sal. Wer abir das, das vnse man ire schulteysen vnd gebawer eine summe machten von irem gute, dy selbe summe sullen sy vns gancz antworten von dem selbin gute vnd ab des icht gebreche, do sal man den schulteisen vmb phenden, vnd vnse burger zu Legnicz sullen auch nicht me alle jare wenn dreyhundirt mark geben vns uff sint Walpurgen tag andirthalphundirt mark geschosses vnd funffczen mark münczegeldis, vnd vff sant Michels tag abir andirthalphundirt mark geschosses vnd funffczen mark münczegeldis, vnd vnse burger zu dem Goltberg sullin vns auch geben achczik mark zu geschosse vnd funffczen mark münczegeldis czu. Des selbin geldis sullen sy vns gebin vff sant Walpurgen tag virczik mark geschossis vnd achte halbe mark münczegeldis, uff sende Michels tag abir virczik mark geschosses vnd achtehalbe mark münczegeldes. Vnd vnse burger zu Haynaw sullin vns auch geben sechczik mark zu geschosse vnd achtehalbe mark münczegeldis. Des selben geldis sullen sy vns geben vff sant Walpurg tag dreyssig mark geschosses vnd an einen virdung vier mark münczegeldis. Zu der selbin rede heysse wir vorbunden vnd voreinen sich vnse egenanten man vnd burger gemeinlich arm vnd reich zu Legnicz, zu dem Goltperge vnd zu Haynaw in desem briff. Also ab wir se wolden adir ymant vnsir ane waldin, vbir ir recht geschosz twingen, also do vor stet geschreben, adir gewalt, adir vnrecht woldin thuen, das se sullen sich selbir manne vnd burger kegen vns vnd vnsen anewaldin ires rechten vortedegen vnd einander helfen vnd noten, das se von vns, vnsen anewalden gewaldes, vnrechtis, getwanges sein derlassen. Danach geben wir zu sonderlichen genaden vnsen offtgenantun mannen vnd burgern, ab wir bey vnsem lebendin leybe vnse sone, irre eine adir beyde, gewaldig wollten machen vnses landes, das wir man vnd burgere nicht andirs an se sullin weysen, wenne das se bey demselben rechte vnd genaden bleyben, dy weyl wir leben, mit inen brifen, also vor stet geschriben. Vnd ubir dy selbe rede sullen vnse man vnd burger mit enander sich vorbinden, dy weyle wir leben, mit iren brifen, vnd an dy selbigen briue wolle wir vnse ingesigil hengen zu eyme vrkunde der warheit. Vnd das dese rede also stete vnd gancz bleybe, dy weile, das wir leben, so gebe wir desen briff vnder vnsem ingesigel, vnd ist geschen zu Legnicz an dem nesten dinstage noch Circumdederunt von gotis geburt tawsent jar dryhundirt jar vnd in dem sibenden vnd dreysigsten jare. Des sint geczuk her Steffan von Parchewicz, her Jeske von Berndorff, her Jeske Buzewoy, her Rule Curdebuk, her Apecz von Czedlicz, her Heinrich Landiscrona vnd her Hannos von Schellendorff vnser lantschreyber, dem desir briff wart befolen.

Bitschens Zinsb. f. 5. — Dessen Privilegb. p. CXXIV; danach gedruckt bei Tzschoppe u. Stenzel, S. 543.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866